استغلال أوقات الفراغ في زمن الكورونا
بقلم: أ.د.عمرو حسن الحسني أستاذ المخ و الأعصاب جامعة القاهرة
#بوست_الجمعة النهاردة عن ١٠ أفكار إيجابية جدا نستغل بيهم هذه الفترة ..ازاي نستفيد بأوقات أنعم الله بها علينا في وسط هذه المحنة
يقول النبي ﷺ: نعمتان مغبون فيهما كثير من الناس: الصحة، والفراغ يعني: كثير من الناس تضيع صحته بغير فائدة، وفراغه في غير فائدة،
١- خد كورس أونلاين:
موقع كورسيرا
موقع رائع عليه كورسات لأكتر من ٢٠٠ جامعة حول العالم
فيها مدفوع و فيها مجاني
نزل التطبيق علي موبايلك .. مفيد جدا و الله
(الرابط أول تعليق)
٢-في جروب لطيف أوي علي الفيس بوك اسمه don't waste your time يعني متضعيش وقتك
عليه أفكار و روابط لكورسات مجانية في كافة مناحي الحياة
(تصوير، رسم،فوتوشوب،marketing، برامج كمبيوتر متخصصة ...)
(الرابط أول تعليق)
٣- التكافل: الأسر الفقيرة و المعيله اللي عايشه يوم بيوم و
ممكن تساعدهم من خلال موقع عمله الأزهر الشريف إعانة للناس دول من بيت الزكاة والصدقات المصري
اللي يعرف حد محتاج و خاصة من هؤلاء الذين لا يسألون الناس إلحافا يا ريت تساعده وتملاله الاستمارة
(الرابط أول تعليق)
٤- إطعام الطعام: أحد وصايا القرآن
وَيُطْعِمُونَ الطَّعَامَ عَلَىٰ حُبِّهِ مِسْكِينًا وَيَتِيمًا وَأَسِيرًا (8)
إِنَّمَا نُطْعِمُكُمْ لِوَجْهِ اللَّهِ لَا نُرِيدُ مِنكُمْ جَزَاءً وَلَا شُكُورًا (9)
عندك حل من اتنين
يا تعمل حسابك في وجبة زياده لحد تعرفه حواليك
يإما لو حريص علي الحجر المنزلي و عدم التعامل مع الآخرين
ادخل علي لينك بنك الطعام المصري .. و اللي أطلق حملة "دعم العمالة اليومية مسؤولية" إبتداءا من 22 مارس و التي سيتم من خلالها توزيع 500 ألف كرتونة طعام كدعم غذائي نتيجة الاثار الاقتصادية لفيروس كورونا
(الرابط أول تعليق)
٥- عندنا كمصريين كنز معرفة لا نعلم عنه شيء و هو بنك المعرفة المصري
Egyptian Knowledge Bank
كنوز من العلوم و المعارف و الكتب المتاحة مجانااااا تماما
فقط التسجيل كمتخصص أو باحث بايميلك الجامعي هتدخل مغارة علي بابا من كبريات المجلات و الدوريات و الآف الكتب متاحة مجانا
و كشخص عادي تسجل ببطاقة الرقم القومي و هناك عليه كتب و موعد تعلبميه لطيفه جدا للأطفال
(الرابط أول تعليق)
٦- التبرع للمستشفيات الكبري كقصر العيني مثلا واجب تكافلي بصفة عامه و بصفة خاصة هذه الأيام :
في أرقام حسابات في جميع البنوك
و ممكن التبرع أون لاين
لبنك الشفاء المصري
داووا مرضاكم بالصدقه
(الرابط أول تعليق)
٧- لو الظروف مش سامحه بالتبرع .. ممكن نصوم تطوع من الآن .. اليوم بقي مناسب جدا جدا للصيام .. الناس في البيت من قبل ٧ ..و المغرب الساعه ٦ تقريبا .. نصوم و نفطر فطار عائلي مع بعض و ندعي لينا و لبلدنا علي الفطار دعوة مستجابة إن شاء الله و نستعد لرمضان من الآن ..
( دعاوي عدم صيام رمضان عشان جفاف الحلق أراها سخيفه جدا)
٨- هناك تطبيقات تفاعليه علي
Google play
apply store
مثل تطبيق" أهل القرآن "
لحفظ القرآن الكريم تفاعليا بصوت القاريء المفضل لك
تختاره من قائمة القراء
٩- شوف المجال اللي انت شاطر فيه و خبير فيه و جهز ماده علميه
في شكل محاضره أو فيديو أو كتاب أو كتيب أو ورق فيه الخلاصة زي بتاع الدروس كده و انشره في جروبات المتخصصين في هذا التخصص
"خيركم من تعلم العلم و علمه "
و متخافش محدش بياخد رزق حد .. بالعكس هتاخد ثواب كل حد علمته حتي بعد مماتك
فإذا مات ابن ادم انقطع عمله إلا من ثلاث: صدقة جارية أو علم ينتفع به أو ولد صالح يدعو له .. اوعي تموت من غير ما تكون جهزت واحدة منهم و (ياريت كلهم )
تضمن لك عدم إنقطاع عملك ..فربما تفلح في الوقت الإضافي إذا لم يسعفك الوقت الأصلي
١٠- استعد لرمضان .. جيب سيرته كتير .. اوعي الضيف السخيف "كورونا " ينسيك الضيف الكريم الجميل ذو الرحمات و البركات.. صوم و أقرأ قرآن و تأهب و تأهل و حط خطة بديله للتراويح لو فضلت المساجد مقفولة ..
و عاهد نفسك ألا تفتح التلفزيون
الحمد لله بقالي سنين طويلة .. لا أشاهد التلفزيون في رمضان مطلقا ( و لا حتي في غيره إلا نادرا)
و احتسب نية محاربة أهل الباطل و الفساد و الإفساد اللي بيكملوا تصوير في اللوكيشن بالكمامات عشان يسعدوا الناس😏😏
